Bitbit ang bag na may lamang lapis, kwarderno, at mga libro. Pag-aaral ng mga leksyon tungkol sa pagbasa at pagsulat.  Pamamasyal sa mga tindahan ng kendi at laruan. Pagtakbo sa palaruan at buhat ang kotse-kotsehan—Isang panaginip. Isang pantasyang maituturing ng batang si Eduard.

     

     Matatagpuan sa kagubatan ng Tagkawayan, Quezon ang limang taong gulang na si Eduard Barbero na sa halip na mga gamit pang-eskwela ang karga, piraso ng troso ang kanyang buhat, pagsisibak ng kahoy sa bundok ang pinagkaka-abalahan, at imbes na nasa mga palaruan ay nasa kakahuyan pasan ang mabigat na responsibilidad sa kanyang murang edad.

     

      Pag-uuling ang ikinabubuhay ng pamilya ni Eduard, bunsod ng kahirapan, maging sya at ang musmos niyang mga kapatid ay nagtatrabaho na rin para matulungan ang kanyang mga magulang.

     

      Sa panayam at kwentong ulat ni Eduard Faraon sa programang, Stand for Truth, inihayag ng ina ni at pamilya ni Eduard ang hirap na kanilang dinaranas.

    

     “Wala po akong magagawa kahit na mga ganyan lang yan pag nakikita akong nagta-trabaho, tinutulungan nila ako at ako’y may sakit na,” pahayag ni Carla Barbero, ina ni Eduard sa interview ng programang Stand For Truth.

     

      Ayon kay Edcarl, kapatid ni Eduard, nasa labindalawang sako ng uling ang napupuno nila sa isang salang nito na kadalasa’y inaabot ng magdamag ang proseso bago i-export at dalhin sa Maynila.

    

     “Minsan sa isang linggo, nakakatrentang sako kami, mahigit dalawang libo. Ang bale namin ay nasa P1,500 na,” kwento pa ni Nanay Carla.

     

     Samantala, ang tira sa kanilang kita ay naipambabayad na rin sa utang at kulang pa upang matustusan ang kanilang mga pangangailangan.

    

     Sa murang edad ay humahawak na ng itak at natuto nang magsibak si Eduard. Bukod dito, responsibilidad na rin niya ang pagbubuhat ng mga troso na halos sinlaki na ng kaniyang katawan at tinatayang 15 kilos ang bigat.

    

     Batay sa datos ng Philippine Statistic Office, nasa 2.1 milyong mga batang edad 5 hanggang 17 ang nakararanas ng child labor, dalawang milyon sa mga ito ang engage sa Hazardous Child Labor o ang mabigat na  mga gawain na hindi angkop sa  kanilang edad.

    

     Samantala, ayon sa www.practo.com, ang pagbubuhat ng mabigat na bagay gaya ng ginagawa ni Eduard at ng kanyang mga kapatid ay maaaring magdulot ng hindi balanseng postural alignment na nakakaapekto sa kalusugan ng nervous system ng isang tao na maaari namang magsanhi ng di pantay na komunikasyon ng utak at ating katawan.

    

     Pangarap ni Eduard na makatapos ng pag-aaral at maging sundalo ngunit dahil sa kahirapan ay napipilitan siya at ang kaniyang mga kapatid na makipagbakbakan sa masukal na kagubatan sa mura nilang edad.

   

     Tila nga naging supling na ng kagubatan si Eduard. Mistulang naging palaruan na niya ang kakahuyan, isang lugar na pilit niyang pinkakiki-bagayan dahil sa kahirapan. Ngunit sa kabila ng lahat ng ito, sabay ng pagbaga ng uling na kanilang produkto, ang pagbabaga rin ng kaniyang damdamin na makaahon sa madilim nilang sitwasyon at magkaroon ng normal at maayos na buhay kung saan hindi itak ang kanyang hawak, kundi lapis; bag at gamit pang-eskwela.